O üzerä, ani pek hızlı  büüyerlär sınır aşırı onlayın platformalarında  satın almaların sayıları , may alez Kitaydan, Moldova devletin  kuvetleri bakȇrlar soruşu, angısı baalı onlayn alış-verişä vergilerin ödemeklerinnän, onnarın sıralarına gireceklär  malların satın almaları, angıları edeceklär 150 evrodan taa az. Ȇkspertlerin laflarına görä,  sade bıldır  memleketä etişti yakın 3 million posılka, angılarında 90%  sade Kitaydan. Eni vergi, iniţiatorların laflarına görä, var nasıl korusun erli alış — verış kurumnarını hem  birleştirsin konkurenţiya koşularını Moldovada biznes uurunda çalışannarın  hem da sınır aşırı onlayn platformlarında.

Erli biznes karşı geler diil bir türlü koşullarlan, neçinki yabancı internet — tükennär  ödämeerlär vergileri, ama Moldova  kampaniyaları  lääzım bunu yapsınnar, çizgileer MD Parlamentin deputatı Marian  Radu. O çizgiledi, ani soruşa lääzım enikunu  yaklaşmaa hem da maasuz kararları, bakmaa durumu  diişilmedik olmaz. 

«Lääzım sölemää, ani  problema halezdän var. Kitay koyȇr çok para, verip kendi alış — verişinä büük subsidiyaları. Bu getirer ona, ani o lider olȇr dünnä alış — verişinä, da doldurȇr panayırları pek ucuz mallarlan — okadar ucuz, ani bunu yok nasıl fikir kaplasın. Yok nasıl rukzak etsin 30 ley»,- Marian  Radu çizgiledi.

Biznes adamnarını  Moldova devletindä dalgalandırȇr  diil sade, angı zamanda posılka etişeer, angıları için ödenmeerlär vergilär, ama problemalar da, angıları baalı insannarın haklarınnan hem da malların kalitesinnän. 

Serdjiu Rabey biznes adamı: «Sayıya koyulu  ȇkonomika agentleri cevap ederlär malların etişmeleri için devletä, ama biz sa hepsimiz deklaraţiya doldurȇrız , öderiz vergileri. Var başka problema — gübürlerin yok etmeleri.  Neçin biz lääzım bakalım kanonnarı, ama sınır aşırı tükencilär- bakmȇȇrlar. Laf gider  birtürlü mallar için».

Biz üürendik Gagauziya yaşayannarından, nicä onnar bakȇrlar  ödemäk için vergiyi onlayn platformasından satın almak için mal.   Nesoy onnar görerlär problemanın çözülmesini. Kimisi onnardan tutturȇrlar  iniţiativayı, başkaları sa korkȇrlar, ani paalar var nasıl büüsünnär. 

«Buna var nasıl bakmaa her taraftan — erli bakarsaydın satın alannarın tarafından — onnara islä satın almaa vergisiz, ama erli bakarsaydık ȇkonomika tarafından, ozaman te onnar, kim  satȇr tükennerdä türlü malları, onnarda vergilär, arenda, kazanç parası».

«Orada taa çok assortiment, orada  paalar çok taa az, da var nasıl bulmaa türlü mal. Burada hep o mal sınır aşırı getirilän, angısını satın alȇrlar, da sora taa paalı satȇrlar. İlk lääzım düşünmää, nicä pensionerlär yaşȇȇrlar».

«Neçin  insan lääzım ödesin taa nesoy sa vergileri?  O ölä da öder vergileri devletä, angısında yaşȇȇr.  Erli bu moldovadakı sayt — var nasıl , ama erli bu başka devlettänsäydi — neçin? 

«Neçin bän lääzım ödeyim vergi?Hepsi biler internet için, orada çok taa az paalar, nekadar panerdän satın almaa. Erli bana lääzımsaydı bişey internettän,  ozaman orada bulȇrım taa hızlı, nekadar tükennerdä yada panayırda».

Öndercilär plannȇȇrlar  üürenmää halklararası becermekleri, da işlettirmää kararı, angısı verecek kolaylık tutturma erli biznes adamnarını.