Çadır-Lunganın resim galereyasında kendi sergisini «GAGAUZ-ART» yaradıcılık toplumun resimcisi Natalya Vornikova açtı. Ȇkspoziţiyaya avtorun  yaratmaları 2019-cu yıldan girdi. 

«Düşünmeklär, süretlär hem düşlär» özel resim hem kukla sergisini resimcinin iç dünnesini açıklȇȇr, söleer Natalya Vornikova. Herbir yaratma —  resimcinin akıla getirmekleri, düşünmekleri, bekim da düş gütmekleri.  

«Resimnerimin taa çoyu başka dünneyi açıklȇȇrlar, diil real. Fikirlär sä koyȇrlar taa derindän yaratmaları düşünmää. Süjetleri siiredici kendisi lääzım düşünsün »,-  söleer Natalya Vornikova.

Resimnerdä, söleer avtor, şafk hem gölgä, düş gütmekleri hem reallık gözledilerlär. Onnarda resimci iç hem ruh dünnelerini açıklȇȇr. 

«Bu adam – yaşlı bekçi, angısı brakamȇȇr opraanı da gitsin, makar ki hepsi yaşayannar ondan kaçtılar. Kahraman baalı zanaatına, erä, neredä yaşadı»,- söleer Natalya Vornikova

Sergiyi Natalyanın avtorluk kukla kolekţiyası tamannȇȇr. Hepsi onnar toplam süretlär. 

«Vardı büük havezim istoriyalı süretleri yapmaa, pirat oldu. Bu personaj – yabancı student, angısının kulturası bizdän uzak. Kış yortularına karşı kızçaaz-koladacı peydalandı»,-  söleer Natalya Vornikova.

Serginin açılışı – haliz oluş avtora deyni, çünkü yaratmalar-avtorun  can aynası. 

«Bilärkenä Natalyanın resimnerini, istedim uşaklar da avtorun işlerini görsünnär. Kuklara okadar cannı, ani herbir bakış diri insanda gibi».

«Resimneri beendim, kuklaları da. Bu resim benim malimi – dädumu aklıma getirder».

«Sergidä fasıl kuklararlan tanıştım. Belli, ani sevgiylän yapılı».

«Hepsindän pek kapitanı beendim. Kaliteli yapılı hem giimneri da denizçinin».

«Hepsindän pek üüreniciykayı beendim, o geçmişi aklımıza getirder. Yabancı studenti da beendim».

Siiredicilerä deyni sergi gelän iki afta  taa çalışacek.