Komrat kasabasının yaşayannarı, angıları yaşȇrlar Yalpug dolayında, esaba alȇrlar uşak meydanın durumunu, angısı bulunȇr onnarın evlerinä yakın. İnsannarın laflarına görä, onun dolayında toplanmȇȇr gübürlär hem kimi oyun ȇlementleri kırık. Yaşayannarın laflarına görä, bu problema çoktan onnarı dalgalandırȇr.
İnsannar nışananȇȇrlar, ani gübürlär meydanda peydalanȇrlar sıkça. Onnar çizgiledilär, ani taa sık kabatlı insannar, angıları burada dinnenerlär, da toplamȇȇrlar ardından gübürleri. Hep ölä insannar sayȇrlar, ani meydanın halını lääzım kimsä gözletsin, neçinki burayı hergün gelerlär uşaklar.
«Burada her gün gübür — bu fakt. Lääzım olsun konteyner gübür için taa büük, sıymȇȇr gübür. Tükän yannaşık bulunȇr, uşaklar gelerlär, sıbıdȇrlar gübür. Ko koysunnar birkaç baner, eni konteynerleri, taa ileri — taa büüktülär».
«Bizdä var komunal bölümneri, angıları lääzım bunun için düşünsünnär. Saa olsunnar bu fidannar için, onnarı diktilär, ama kimär sıra lääzım tertiplemää bu eri dä. Uşaklar severlär bu meydanı, uşakların çoyu burada oynȇȇrlar. Bezbelli, şindän sora çoktan hiç kimsey tertiplämedi bu eri».
Komat kasabasının komunal çorbacılıın gübürlerin toplamasında öndercinin Pioglo Pötrının laflarına görä, bu meydan bulunmȇȇr bölümün balansında. Cevaplık teriplemäk için, onun laflarına görä, ilk — durȇr yaşayannarın omuzlarında. Ama ölä olarsaydı, ani primariyadan izin verärsäydilär, bizim işçilär giderlär da tertiplerlär.
«Bizim işçilär gelerlär da topllȇȇrlar otu da, gübürleri dä, angıları orada var, ama bu meydannar diil bizim balansta, bizdä var meydannar, angıları bizim balansımızda bulunȇrlar, ama diil bunnar. Primariya yaptı uşaklar için, diil başka rayon için. Herbir ana — bobaya islä gelecek, açan onnarın uşakları pak, tertipli meydana gezecek»,- Pötr Pioglunun laflarına görä.
Erli kuvetlerin temsilcileri nışannȇȇrlar, ani yaşayannardan ofiţial danışmaklar meydanın halı için etişmedi onnara. Komrat primarın yardımcısı Viktor Baldji çizgiledi, ani her bir yaşayan var nasıl doorudan danışsın primariyaya, erli esapladısaydı bölä uurda problemayı — telefon açsın, patredi yollandırsın, ozaman uzmannar operativ esapa alaceklar bu problemayı.
«Var ölä yaşayannar, angıları bizä danışȇrlar, yollandırȇrlar patretleri, da biz kendi sıramızda yollandırȇrız bizim iıçileri, alsınnar deyni esaba ölçüleri. Bu olayı bizä kimsey açıklamadı»,- Viktor Baldji çizgiledi.
Viktor Baldji hep ölä nışannadı, ani önemni diil sade haberlemää problema için, ama korumaa onu, ne yapıldı kasabanın yaşayannarı için. Onun laflarına görä, erli herbir insan yaklaşarsaydı büük saygılıklan cümnä varlıına, tutmaa paklı hem tertipli, bu kolayladacek komunal çorbacılıın işini, da yapacek kasabayı taa komfort hepsi için.
«Makarki onu, ne biz yapȇrız bizim tarafımızdan, bizim yaşayannar onu korusunnar hem da saysınnar başkaların işini. Büük yalvarmaklan danışȇrım bizim yaşayannara, kırmama, korumaa — bu en önemi»,- Viktor Baldji nışannadı.
Viktor Baldjı çizgiledi, ani problema, angısı baalı gübürlärlän uşak meydannarında — bu diil sade teriplemäk uurunda soruş, ama kultura tarafından da.