Kolada türküleri Gagauiyada kalȇrlar en önemli  adetlerin birisi. Evladlardan evladlara geçirilerlär diil sade türkülär,ama yortunun özel ruhu da,angısı birleştirer ayleleri, komuşuları, hem bütün küüleri. Bu adet doldurȇ Kolada günnerini sıcaklıklan, sevinmeliklän, getirder aklıya kultura hem halk zenginniklerin kooruması için.

Kolada türkülerin adeti Gagauziyada evel vakıtlardan büünkü günä kadar diri kalȇr, birleştireräk evladları, kaavileştireräk koruyarak halk hem kultura varlıını.Kolada türküleri öterlär yanvarın 6-dan 7-nä dooru gecä.Bu vakıtta uşaklar gruppalarlan gezerlär evdän evä, kutlayarak yaşayannarı, dilerä onnara saalı, usluluk, iilik gagauz hem başka dillerdä.

«Avşamêrsın, çorbacı, 

Büün olduk koladacı.

Bu gecä duudu Hristos,

Üreemiz bundan çok hoş.

Biz kutlêêrız hepsini, 

Ayırı en pek seni.

Ekinnär büüsün üüsek,

Unnansın sizdä elek.

Tok gezsin ne var diri, 

Kalmasın günnär geeri.

Hatırlı Krêçun geçsin,

Hristozu insan sevsin!

Kutlamaa biz başardık, 

Bir da ev atlatmadık.

Taa tez çıkın kapuya, 

Verin yol Koladaya!»

Uşaklar paylaşȇrlar,ani büük sevinmeliklän kolada türkülerinnän gezerlär evdän evä, neçinki onnar aşırı onnar ii haberi İisus Hristozun duuması için  getirerlär, da duyȇrlar kendilerini büük hem önemli olayın payı gibi.Çorbacılar şükür ederlär koladacıları,vereräk onnara  tatlılıkları,  meyvaladı yada para, ne nışannȇr vaarlıı, iilii hem iisözlemeyı eni yılda.

«Bän taa küçüklüüklüündän görärdim nicü bobam kolada gezärdi.Bän pek beenerim bu adeti».

«Bän pek severim gezmää koladayı hem kutlamaa hepsini insannarı Eni Yıllan».

«Bän pek sevinerim,ani geldi bu şen kolada yortuları».

«Kutlȇrım hepsini Eni Yıl yortularınnan».

Butakım, kolada türküleri  Gagauziyada kalȇrlar diil sade gözäl adet gibi,ama olȇrlar diri baalantı eski hem şindiki zamannarın arasında. Onnar üürederlär adetlerä hatır gütmeya, birlää, ruh zenginniklerinä, belli ederäk Koladanın baş manaasını – sevgiyi, usluluk, ii haber için, angısı birleştirer insannarı, bakmayarak yaşlkara hem vakıtlara.