Kasım ayın 12 – dä bütünnä dünnedä nışannanȇr ak ceer hastalıınnan güreşmäk günü. Bu toplantının neeti — nekadar taa zedä annatmaa ak ceer hastalıı için hem da profilaktika ölçüleri için. Bunun için haberledi doktor – pulmonolog Anna Buzadjı.
Ak ceer hastalıı- bu suuklanmış ceer, angısı, kural gibi, infekţiyadan çekiler. Ak ceer hasatalıına girer bir sıra ulaşmak, bölä nicä – viruslar, bakteriyalar, hem başka. Ak ceer hastalıın üüsek risk grupasına girerlär — büük yaşta insannar, uşaklar 5 yaşına kadar, ar hastalıklardan yaşayannar, bölä nicä – kalp hem da ceer, şeker hastalıından, imunodefiţitlan hem da kötü tabetlärlän. En sık ak ceer hastalıınnan insannar hastalanȇrlar Kasım hem da Baba Marta aylarında, nışannadı doktor – pulmonolog Anna Buzadji. O çizgiledi, ani kendi başına ilaçlanmaa olmaz.
«Diişer atmosfera, bizim havamız, peydalanȇr nesoysa naemnik, temperatura. Da erli uşak mı, yada büük yaşta insan mı, geçirärsaydı hastalıı ayaklarında – bu diil dooru. Kimär sıra uşakların anaları yada büüklär, danışmȇȇrlar yardım için doktorlara, ama kendi başlarına ilaçlȇȇrlar ak ceer hastalıını. Zamandaşta, bu viruslar dayanȇrlar hepsinä, da verilmeerlär butakım ilaçlamaya, nicä biz isteeriz. Onun için, o insannar, angıları diil dooru kablederlär kendibaşına ilaçlamayı, düşüp bizä, zor onnarı ilaçlamaa»,- pulmonolog Anna Buzadji çizgiledi
Ak ceer simptomnarın aralarına girer — üsürmäk, üüsek güüdenin temperaturası, zor solumak, terä atmak, zor kendini duyȇrsın, çizgiledi doktor – pulmonolog Anna Buzadjı. Avtonomiyanın yaşayannarı pay oldular, nesoy ölçüleri onnar kullanȇrlar, korumaa deyni kendilerini ak ceer hastalıından.
«Da, işittim, bu hastalık vardı GOVİD – 19, kim öldü ozaman, kim hastalındı. Bizim bolniţalar hepsi doluydular insannarlan. O üzerä, lääzım korumaa kendimizi hem da danışmaa doktorlara, çünkü kendibaşına bu işi başaramayacan».
«Biz bıldır fevraldä düştük bolniţaya kızımnan, angısı yatalak, pnevmoniya onda olduydu. Ozaman bolniţaya düştük, ilaçlandık. Pek suuk içmeeriz, ilaç ta içmeeriz, ama korunȇrız».
«İşittiniz mi bişey ak ceer hastalı için? Geçirdik tä. Nezaman? 3-4 yıl geeri. Söläyiniz, nicä bu haldan çıktınız? Kopça içtik. Ne yapȇrsınız ulaşmamaa enidän? İyeriz suvan, sarmısak, ardey?»
Profilaktika ölçülerinä girerlär – ellerin yıkaması sabunnan yada antiseptiklärlän, kullanmaa maskaları cümnä erlerindä, uzak olmaa biri – birindän, dooru kullanmaa imei, sık pençerleri açmaa, kolvermää deyni ayerı hem da tutmaa paklıı evin içindä.