Gagauziyada soţial asistentlär yardım ederlär yaşayannara suuk zamanı için kompensaţiya kabletmesindä bildirimneri vermää.
Soţial asistentlär hergün insannara konsultaţiya vererlär hem yardım ederlär dooru dokumentleri compensatii.gov.md. platformasında doldurmaa. Yardım temsil ediler yaşayannara, angılarına zor kendibaşına onlayn bildirimi vermää, nışannadı Gagauziya saalık hem soţial koruması bakannıın uzmanı Valentina Marin: «Kasım ayın 3-ndän çeketti registraţiya kompensaţiya kabletmesi için şafka, gaza. Taa çok insan geler, angılarında yok kolalık kendileri bildirimi versinnär. O pensionerlar, kolaylıksız insannar hem onnar, kim 45 yaşından taa büük. İlkin toplȇȇrız dokumentleri, kontrol ederiz onnarı, sora kiyatta yazȇrız hepsi haberleri da sora gov. md platformasında erleştireriz».
Saalıı hem soţila koruması bakannıın uzmannarın laflarına görä bu vakıt gözlediler çok insannarın danışması da bunun için soţial asistentların rolü önemni. Onnar diil sade bildirimneri doldurȇrlar, ama annadȇrlar kompensaţiya kabletmesinin sırasını, lääzımnı dokumentlerin listesini belli ederlär hem annadȇrlar, nicä bakılacek kişinin danışması.
Svetlana Kalak, uşak hak koruması baş uzmanı, laflarına görä: «Zorluk yok. Hepsi gelerlär lääzımnı dokumentlärlän da biz onnarı hepsini problemasız sayıya koyȇrız. Bir danışmamız var insan gelsin saat 12-yadan gündüz hem saat birdän sora olmasın deyni burada çok insan sırası üülen zamanında».
Barabar çalışmakların yardımnnan şansora üzlän Gagauziya yaşayanı veräbildi bildirimi da onnar kabledäbileceklär finans yardımını devlettän suuk zamanı için.
«Geldik kompensaţiyaya vermää gaz, şafk. Bıldır verdilär biraz yardım. O az, ama hep okadar. Bir pensiyaylan zor yaşamaa».
«Geldik kompensaţiya için, neçinki pensiya küçük. 42 yıl kolhozda işledim gecä gündüz, çıktım pensiyaya 507 leya, var mıi nicä bölä paraya yaşamaa. Sora kaldırdılar da şindi 3300 ley. Te geldik makar biraz yardım olsun. Bän yalnız yaşȇȇrım kendim yapamayacam, bunun için topladım dokumentleri da geldim».
«Kabletmää posobiyayı kış zamanı için. İslää olaceydı pensionerlara pensiyayı kaldırsınnar da burayı gelmemää. Kopmensaţiya sıcaa, gaza, şafka hepsinä».
Soţial izmetlär aklımıza getirerlär, ani kompensaţiya kabletmesi için bildirimi suuk zaman için var nasıl vermää suuk zamanın ayların 28-zinädän. Posobiya da ödenecek o vakıttan ,nezaman bildirim verildi. Soţial asistentlar danışȇrlar vatandaşlara brakmasınnar hepsini bitki günnerä. Eer olarsaydılar zorluklar, yaşayannar var nasıl danışsınnar kendi soţial asistentinä yada primariyaya konsultaţiya için.