Noyabrinin 14-dä geçti Gagauziya Bakannık komitetin oturuşu. Bakıldılar soruşlar, angıları baalı regionun soţial- ekonomika ilerlemesinnän. İş sırasına girdilär kararlar, angıları baalı bücet politikasınnan, infrastruktura proektlerinnän hem cümnä kurumnarın tutturmasınnan.
Bakannık komitetin azaları baktılar diişmekleri GHT 2025-ci yılına baş investiţiyaların pay etmesi için kararına. Düzmek hem infrastruktura bakanı başı Sergey Bolgar nışannadı, ani diişmeklär baalı eni infrastrultuta proektlerinä, angıları doorudulu avtonomiyanın yaşamak erlerindä koşulların taa ii yapmasına.
«Dokumenttä proektlär tabliţada lääzım eklemää hem doldurmaa 22 hem 23 sıraları. 22-ci o Komrat St. Kuroglo adına gimnaziyasında trotuarların yapılması. Sayı 923 bin 280 ley kurȇr. 23-cü punkt — Djoltay küüyü. Güneş panellär skvajina için. Sayı 153 bin ley. Çıkış sıracıkta bölä lääzım yazmaa — 16 million 700 bin 850 ley, asignovaniya sayısı da 6 million 794 bin 300 ley»,- Sergey Bolgar nışannadı.
Kabledildi karar diişmeklärlän hem eklemeklärlän dokumenti GHT doorutmaa.Bakannık komitetin oturuşunda bakıldı, nekadar kanona görä dooru hem effektiv kullanıldı 2023-2024 yıllarında cümnä finans resursları hem varlıın Çadır dolay administraţiyasınınan. Administraţiya başı Natalya Şoşeva nışannadı, ani Gagauziyanın saymak palatası belli etti kimi yannışlıkları da teklif etti planı, nicä onnarı yok etmää.
«Vardılar maana bulmaklar, ani şoferlara iki kat ödener, açan onnar dinnenmäk günnerindä işleerlär. Onnar ya dolay başını, ya onun yardımcısını, yada uzmannarı getirärdilär türlü olaylara. Vardı bu iş için izin, ama lääzımdı buhgalteriyaya da dokumentleri bu iş için vermää. İkinci da Çadır dolay rezerva fondundan paraların kullanması. Biz Gagauziyanın kararını kullanardık, orada var milli hem halk yortular da o karşı gider hükümetin kararına. Bizä maana buldular, ani bizdä yok hak kullanmaa paraları rezerva fondundan Gagauziya kararına hem kurallarına görä. Da lääzım bizim kararımızı yapmaa ölä, ani o hükümet kararına uysun»,- Natalya Şoşeva nışannadı.
Nekadar kanona görä dooru hem effektiv kullanıldı 2023-2024 yıllarında cümnä finans resursları hem cümnä varlıı Çadır dolay administraţiyasınınnan kontrol etmeklerin çıkışları esaba alındılar. Bakannık komitetin oturuşunda kabledildi karar vermää 85 bin ley sportçulara, trenerlerä, kim katıldı Evropa hem dünnä güreş, boks hem şahmata çempionatlarına . 1 million 35 bin ley doorudaceklar birzamankı ödeklerä uşakların duuması için 2025-ci yılın oktäbr ayında. Para yardımını kabledecek 114 gagauz aylesi.