Halk avaları, milli giimnär hem oyunnar, dedelerdän kalma adetlär, datlı imeklär, ev şarabı — butakım «Gagauz Şarap Yortusu 2025» festivali, ona katılan insannarın akıllarında kalacȇk . Yortulu olay noyabrinin 9-da Komradın baş meydanında geçti. Binnärlän kişi festivalä katıldı.
«Gagauz Şarap Yortusu 2025» — güz zamanın en beklenän yortuların birisi. Bu gün Komrada bütün Gagauziyadan, Moldovanın türlü dolaylarından, aşırı devletlerdän insananr toplandılar. Yortunun baş neeti — adetleri korumaa hem ilerletmää. Yortunun açılışında üzlän uşak türlü oyun kolektivlerindän, meydanın orta erinä dizilip, halk oyunu oynadılar. Şarap yapmak adetleri gösterildilär. Butakım festivalin musaafirleri gördülär, nicä yıllar boyunca korunan adetlär büünkü günnän karşılaşȇrlar hem korunȇrlar.
«Keefimiz pek islää. Dileriz hepsinä saalık hem uygunnuk».
«Taa girgin, taa arif olalım. Optimist olalım».
«Adetlerimiz korunsunnar hem ilerlesinnär».
«Saalık, kısmet, zengin bereket olsun, imelik zebelli olsun. Canımıza paalı insannarımız saalıkta olsunnar».
«Uygunnuk, iilik hem annaşmak olsun! Bu yortu adetlerimizi hem halkımızı andırȇr».
Bakannık komiteti başı ilk yardımcısı İ.Uzun kutladı Gagauziyanın yaşayannarını Kasım halk yortusunnan. O çizgiledi, ani bu festival — bereketli topraan hem onu işleyän çalışkan halkın simvolu.
İlya Uzun, Bakannık komiteti başı ilk yardımcısı, çizgiledi: «Bu yortu bizi birleştirer. Bu yortu adetlerimizä baalı. Anȇrız o becerikli hem işçi insannarı, angıları üzümdän şarap yapȇrlar. Uygunnuk olsun. Ko eni tanışmaklar kaavi dostlaa getirsinnär. Ko hepsi dualarımız büünkü gündä iilik için, dünnedä usluluk için hem halkımızın ilerlemesi için sölenilsinnär».
Kutladılar Gagauziyanın yaşayannarını Kasım halk yortusunnan GHT viţe-spikeri G.Leyçu hem Çiftçilik bakannıın başı S.İbrişim: «Şarapçılarımız kendi zanaatlarını ilerletsinnär, şaraplarımız halklararası uurunda taa üüsek uurlara çıksınnar. Çizgileerim, ani bitki yıllar şaraplarımızın kalitesi taa islää oldu».
Georgiy Leyçu, GHT viţe-spikeri, çizgiledi: «Bu gün çalışkan insannarımız, gözäl adetlerimiz, bereketli topraklarımızı andırȇr».
Festivaldä avtonomiyanın herbir küüyün kasabanın kendi aulcuu vardı. Burada onnar musaafirleri karşıladılar hem ikram ettilär. Bundan kaara adetleri hem türlü master-klasları gösterdilär. Musaafirlär bu şalışmaları üüsek notaladılar.
«Yortunuzu pek beendik».
«Türkiyedän kulturanızlan tanışmak için geldik. Beendik».
«Türkiyedän musaafirleri kablederiz. Teklif ettik onnarı bu yortuya. Adetlerimizi görsünnär istedik».
Şarap yapan çorbacılıkları kendi mallarını tanıttılar.
Evgeniy Sırbu, şarapçılıklan zanaatlanan adam, Çumay küüyü: «Burada şarap içmesi kulturasınnan tanışȇrz».
Halk ustaları da festivala katıldılar. Onnar kendi becerikli ellerinnän yapılı tertipleri tanıttılar.
Mihail Yazadji, usta, Avdarma küüyü: «Adetlerimiz ko unudulmasınnar. Cannarımızda sevgi hem şennik olsun».
Gagauz artistleri, sţenaya çıkıp, insannarı şennendirdilär.
«Saygılı benim halkım, sevinerim, ani bu gözäl gündä bän sizinnän birliktäyim».
«Bu yortu bizim kulturamızı ilerleder».
Halk muzikası, milli giimnär hem oyunnar, dedelerdän kalma adetlär, datlı imeklär, meraklı buluşmaklar hem şen gülüş — butakım «Gagauz Şarap Yortusu 2025» festivali kalacȇk ona katılan insannarın akıllarında.