Büük ayın 12-dä geçti iş grupanın oturuşu, angısı millet uurunda zanaatlanacek gagauz dilini üürenmesi, ilerlemesi hem yayınlaması soruşşlarınınnan. oturuşta pay aldılar Gagauziya Baknnıklar temsilcileri, KDU, M.Çakir adına kolecin uzmannarı,MD üüretmän hem araştırmak ministerliin uzmannarıhem halklaarası partnörlar.
Oturuşun süresindä bakıldı proekt angısı işlediler gagauz dilini üürenmesi, ilerlemesi hem yayınlaması neetinnän. Nicä nışannadı MD Üüretmäk hem araştırmak ministerliin milletlärarası ilişkileri bölümün bölümün öndercisi İvan Duminika programa 2026-2027-ci yıllarda geliştirilecek. Programma denemäk proekti gibi geçirilecek hem teklif edilän kolaylıkları geliçtirmää yardım edecek. Bundan kaarä onun gerçeklenmesinin herbir uurunda monitoring yapılacek.
«İş grupanın kurulması hem milli programanın işledilmesi lääzımnık gibi hem vakıtlan yapılan adım gibi kablediler. Bu grupa zanaatlandı gagauz dilini üürenmesi, korutması hem yayınlaması maasuz programanın kurulmasınınnan. Bu uurda esaba alındılar üüredicilerin hepsi teklifleri. Biz barabar iki yıla iş programasını işlettik»,- İvan Duminika nışannadı.
İvan Duminika nışannadı, ani 2024-cü yılın yaşayannarı yazmak proţesi belli etti, ani gagauz dilini bilän hem bu dildä lafedän insannarın sayısı taa az onnardan, kim kendilerini gagaz milleti olarak bildirdi.
«Gagauz dilini Ana dili gibi 87407 yaşayan belli ettilär. Bu hpsi gagauzlar sayısının 90 %-ni kurȇr. Bununnan bilä sade 48 905 kişi belliettilär, ani lafederlär bu dildä. Buradan biz göreriz, ani 38000 insan lafetmeerlär hem bilmeerlär gagauz dilini Avtonomiyada. Bölä büük ayırıklık milletçilik hem dil uuralarında, söleer bizä onu, ani biz bu problemanın çözülmesinä karışalım lääzım»,- Duminika nışannadı.
Gagauziya Üüretmäk bakanı Nataliya Kristeva nışannadı, ani gagauz dilini üürenmäk hem onu bilmemäk probleması birkaç faktorlan baalı, onnarın çözülmesinä bu komissiyanın işi doorudulu olacek.
«Gagauz dilini üüretmä probleması toplu onda, ani yıllar boyunca dil durumu kurrikulum programalarında esaba alınmadı. Yıllar boyunca kurrikulum işlenildi gagauz dilindä lafedän hem dili bilän uşaklara deyni. Büün güç sölemää, ani uşakların taa büük payı gagauz dilini bilmeerlär, hergünkü lafetmektä onu kullanmȇȇrlar, hem üürenerlär o dili, angısı onnara deyni yabancı »,- Nataliya Kristeva nışannadı.
Problemaya bilim uurundan da yaklaşmaa lääzım, çizgiledi Gagauziya M.Maruneviç adına BAM öndercisi işini götürän İrina Konstantinova. O nışannadı, ani gagauz dili diil sade lafetmäk kolaylıı Gagauziyada, amma istoriya, adetlär,ruh zenginnikleri arasında baalantı da.
«Büünkü bi̇zi̇m buluşmamız taa bi̇z sıra i̇nandırȇr, ani̇ diil sade biz gagauziyada, amma devlet tä bu broblemanın çözülmesinä katılmaa isteer. Ki dil uurunda problemaları çözmää»,- çizgiledi İrina Konstantinova.
Programmayı işletmektä pay alȇrlar gagauziya Üüretmäk hem Kulturabakannıkları KDU, M.Çakir adına kolec uzmannarı, Antem programasının uzamannarı hem MD Üüretmäk hem aaraştırmak ministerlii. Gagauz dilini üürenmesi, ilerlemesi hem yayınlaması proekti üüsek başarıları gösterärsä onun çıkışları MD Hükumedinnän 2028-2032 yıllara kabledilän dil üürenilmesi programasına temel olacek.