Komratta M.Çakir adına kolecindä eni kiyadın tanıtımı geçti. «Gagauz dili. Gramatika analizleri» didaktika materialı üüredicilerä hem üürenicilerä deyni üzä çıkarıldı.
«Gagauz dili. Gramatika analizleri» didaktika materialı kiyadını becerikli uzmannar hazırladılar, ani artık çok yıl okulda işleerlär hem gagauz dilini üüretmäk soruşlarında ustacılıkları üüsek. Bu Anna Stoletnäyä, Galina Sirkeli, Lidia Yusümbeli, Anna Sucman, Maria Çernioglo. Üüredicilär açıkladılar, ani çok sıra onnar işiderlär bölä soruşları zamandaş insannardan: «Neçin bizä lääzım o gramatika, türlü gramatika analizleri? Neylän o bana yardımcı var nicä olsun?». Ama praktikada belli olȇr, ani dilin gramatikasını bilmärsaydık islää, bizim sözümüz dä olmayacek annaşılı, düzgün, parlak, söledi pedagogika bilgileri doktoru A.Stoletnäyä: «Biz bakalavra ekzamenneri testlerini kontrol edärkänä denedik, ani şkolalarda herbir üürenici kendiycesinä yapȇr analizi, kendiycesinä shemaları gösterer. Birisi geniş yapmış bu analizi hem shemaları çizmiş, öbürü dä pek kısa yapmış. Bir, ani hepsi birtürlü olsun, o mutlak. İki dä, bilmärdik, angı notayı koymaa. Çünkü yoktu bir model. Bu bizim zorluumuzdu. Bir karar aldık — yapalım kendimiz modelleri. Da ko bizim örneklerimiz olsun sizä örnek. Sanȇrım, ani bizdä bu iş oldu. Da olsun ölä, ani herbir şkolada herbir üürenici birtürlü bu analizleri yapsın».
Gramatika — dilin fundameti: o yapêr fikiri taa annaşılı, sözü açık, teksti sä inandırıcı. Gramatikasız var nicä önemni işleri kaybedelim sözümüzdä — açıkladılar kiyadın kurucuları. Onnar urguladılar, ani önemni, ki kurallar korunsunnar. Ozaman da üürenicilerin sözü kaliteli olacek, kurallara görä düzülecek.
Lidia Yusümbeli, Gagauz dili üüredicisi, Kıpçak küüyü B. Yanakoglo adına liţeyi: «Gagauziyada çok işlär yapılȇr. Çıkȇr mi kiyatlar, dergilär tiparlanȇr. Uşaklar türlü konkurslara katılȇrlar. Er busoy gidärsä — dilimiz ilerleyecek. Önemli, ki analar-bobalar da uşaklarınnan gagauzça lafetsinnär. Öleliklär dilimiz bu er üzündä kalacȇk».
Gagauz Eri Üüretim bakannıın adından «Gagauz dili. Gramatika analizleri» didaktika kiyadınının kurucularına Dillär ilerlemesi bölümü başı M.Uzun danıştı.
Mariya Uzun, Üüretim bakannıı Dillär ilerlemesi bölümü başı: «Sizin çalışmaklarınız — paasız bir kolaylık bizim için. «Gagauz dili. Gramatika analizleri» didaktika materiallarının yardımınnan üüredicilär bulaceklar cuvapları kendi soruşlarına».
Finans uurunda yardımcı oldu Moldova devleti Parlamenti hem GHT ȇks-deputatı İvanna Köksal. Danışarak üüredicilerä o söledi.
İvanna Köksal Moldova Parlamenti hem GHT ȇks-deputatı: «İşiniz zor. Onu taşıyȇrsınız, götürersiniz. Sizä kadar da bizim yaşlı üüredicilerimiz onu götürdülär. İşimiz bitmedi. Ük hep taa var. O ükü taşımaa sizä yardım etmää herzaman hazırız».
«Gagauz dili. Gramatika analizleri» didaktika kiyadı avtonomiyanın gagauz dili hem literaturası üüredicilerinä verilecek.