Gagauz avtonomiyasında kış yortularını sayȇrlar hem nışannȇȇrlar. Kolada, Hȇy-hȇy hem Eskiycä Eni yıl – avtonomiyamızın kultura yaşamasının bir payı. Adetlär, angıları yıl-yıldan evlad boylarına geçerlär, büün gençlerimiz koruyȇrlar.
Yortulu günnerdä «Poläki Bucaka» ansamblisi adetçä Eni yıl kutlamaklarınnan avtonomiyanın evlerinä geler. Eskiycä Eni yıla karşı oyun kolektivin pay alannarı Gagauziyanın yaşayannarını kış yortularınnan kutladılar, baaşlayıp onnara türküleri, oyunnarı hem dilemekleri.
«Eni yl yortularında biz Kolada gezdik, Ay Vasiliya karşı Hȇy-hȇy gezecez, insanı kutlayacez. Вizim programada – şiirlär hem türkülär. Kolektivimizdä incäzanaat hem religiya birleşerlär».
«İnsan bizi gülüşlän karşılȇȇr, kimär kerä yortulu masaya çaarȇrlar. şükür ederlär, sıcak lafları söleerlär».
Evlad boyumuz sayȇr, ani Eski Eni yıl Gagauziyada populär yortu.
«Eski Eni Yıl adetleri hem tradiţiyaları dedelerimizlän korunmuşlar. Biz onnarı beeneriz hem bakȇrız: booday, papşoy tenelerini çorbacıların aullarına atȇrız, gülüşleri, duaları biri-birimizä baaşlȇȇrız».
«Gagauziyada Eski Eni yıl halizdän saygılı yortu. O bizi birleştirer, herbir ayledä yortulu masa dinanȇr».
«Severim bu yortuları bän. Onnar bizä vererlär taa bir kerä eni duyguları yaşamaa, yakın insannarımızlan buluşmaa hem käämil günneri geçirmää».
Eskiycä Eni yıl ülian hem grigorian kalendarlerinnän baalı, o nışannanȇr yanvarin 13 -14 karşı.Yanvarin 13-dä avşamnen, Ay Vasiliya karşı, genç kızlar hem çoçuklar türkülärlän hem oyunnarlar senselelerini hem yakındakılarını kutlȇȇrlar.