Kazayak küüyündä geçti dostluk buluşmakları sambo güreşmesindä Kazayak hem Çeşmäküü komandaların aralarında. Bu yarışmalar bakılı Balkan oyunnarında pay almaların sınırlarında.

Sportçular buluştular türlü aarlık kategoriyalarında, gösterip kendi islää uurda hazırlanmaklarını. Atmosfera dostluydu, herbir çıkış kaarşı-kaarşıya yardım etti onnara taa üüsek uura kaldırmaa becermeklerini. Kazayak küüyün trenerı Pötr Uzun urguladı, ani bölä buluşmaklar pek önemni sportçular için.

«Hazırlanȇrlar Balkan oyunnarına bizim çocuklar da çaardık çocukları güreşmää — hepsi uşaklar güreşerlär, taratmayacek kimsey, hepsi tarayaceklar. Balkan oyunnarına gider Kavalji Evheniy, Danç Vadim hem Kuyujuklu Egor. Geçti yıl aldılar iki ilk eri, hem ikinci eri.Sanȇrız, ani bu yıl da olacek islää çıkışlar, umutlanȇrız, ani hepsi olacek islää»,- Pötr Uzun urguladı.

Çeşmäküü komandanın treneri Mihail Berber söledi, ani Kazayaa seftä gelmeerlär. Bölä buluşmaklar çok fayda getirerlär sportçulara.

«Bu işlär olȇrlar pek faydalı, biz Kazayaa çoktan geleriz, bir-iki yık oldu nicä geleriz dostluk buluşmaklara. Taa sıkça buluşalım, biz gelelim, çaaralım bizä. Uşaklara bu pek faydalı olȇr»,- Mihail Berber söledi.

Genç sportçular urguladılar,ani pek meraklı onnar için bölä dostluk buluşmakları, onnar taa çok işleri üürenerlär.

«Bu sportun yardımınnan bän ilerleerim, kendimi var nicä hererdä koruyım».

«Yarışmalarda benim islää çıkışlarım, bän bu sportu severim, yardım eder yaşamakta».

Sportçu Kazayak komandasından Vadim Danç artık 12 yıl zanaatlanêr bu uurda. O islää hazırlanêr çünkü pay alacek Balkan oyunnarında Bulgariyada. Vadim nışannadı, ani bölä buluşmaklar sportlan zanaatlanmakta pek lääzımnı.

«Bu sport saalıı kaavi yapêr, bizdä geçer dostluk buluşmakları, onnar verer kolaylık herbirinä taa islää kendini göstermää, komandaların arasında baalantıları kurmaa. Biz pay alacez Balkan oyunnarında Bulgariyada, hazırız, sanêrım, ani gelecez üüsek ödüllärlän»,- Vadim Danç nışannadı.

Balkan oyunnarı Bulgariya devletindä geçeceklär noyabr  ayın 14-ndän -17-nädan.