Moldovada «Ceneraţia pâdurii» milli kampaniyası geliştiriler. Onun baş neeti daa meraların sayısını zeedeletmää.
Tabiat ministerlii hem Moldsilva agentstvosunun saytlarında var nicä bulmaa informaţiyayı nezaman hem neredä fidannar dikileceklär hem fidan tohumrarı ekileceklär. Hep burada var nicä bulmaa organizatorların telefon nomerlerini, onnarlan baalanmak için. Moldova kuvetleri vatandaşları «Ceneraţia pâdurii» milli kampaniyasına katılmaa teklif eder. Tabiat ministerlii başı G.Haşder danışarak Moldovanın yaşayannarına söledi: «Herbir eni aaç gösterer, ani biz geleceemizi düşüneriz, ani biz isteeriz, ki Moldovamız eşil olsun, tabiatımız korunsun. Hep ölä bu milli kampaniyaya katılannar evlad boylarımıza deyni ii bir örnek olacȇklar».
GRT-da «Dialog studiyada» programasında «Komrat daa çorbacılıı» devlet kurumu başı A.Peykov çizgiledi, ani bu güz hem kış zamannarında daa çorbacılıı 150 ektar eni daa dikmää plana koydu hem var olan genç daaları tamannamaa — bu daalar 60 ektar kurȇrlar.
«Var neetimiz 800 000 fidan hem tohum dikmää. Bu sayıda 600 000 – o salkım, 9 000 – glediçiyä, 87 000 – dişbudak, и 65 000 — meşä. Bu uurda primariyalar bizimnän işleerlär. Onnar eni daalar için meraları vererlär»,- Aleksandr Peykov çizgiledi.
«Komrat daa çorbacılıı» devlet kurumun izmetçileri bu toprakları daa dikmesi için hazırlȇȇrlar. Fidannar büümää başladıynan onnar onnarı besleerlär hem koruyȇrlar. Fidannar iicä dallandıktan sora “Komrat daa çorbacılıı” devlet kurumu daayı geeri primariyanın balansına geçirer. Bundan sora bu daa için primariya cuvaplı olȇr. Geçennerdä Kongazçık küüyü gimnaziyasının üürenicileri hem Tehnika uçilişçesinin studentleri Daa çorbacılıına yardım ettilär. Onnar meşä hem dişbudak aaçların tohumnarını ektilär. A.Peykov teklif etti Gagauziyanın yaşayannarını bu akţiyaya katılsınnar.
«Saygılı yaşayannar önemni, ki siz kendi istediinizä görä bu akţiyaya katılaasınız. Büük iş yapılacȇk. Ko herbirin katkısı olsun. Da herbiri 1, 2, 3 yıldan sora sevinsin, ani onun hatırınnan eni daa büüyer»,- A.Peykov teklif etti.
«Ceneraţia pâdurii» milli kampaniyası Prezidentin M.Sandunun teklifinä görä geliştiriler. Onun baş neeti devletin daa meralarının sayısını zeedeletmää hem tabiatı korumaa, ȇkologiyayı korumaa. 2032-ci yıladan devlet kuvetlerin açıklamasına görä 145 bin ektar eni daa dikilecek. Programa geliştirilmää başladıktan beeri devlettä 16 000 ektar eni daa artık dikildi.