Gagauzkaların evelki el zanaatı — koyun malından yatak için tertipleri yapmak. Beşalma küüyün yaşayanı, «Sedef» folklor kolektivin pay alanı Elena Çeban 50 yıla yakın yapaadan yorgan hem döşek diker. Bu zanaat ustanın temel işindän – terziliktän başlamış. Svetlana Dimitroglo Beşalma küüyndä ustaylan buluştu.
Gagauzka Elena Çeban Beşalma küüyündän yarım asir şansora yapaadan yorgannarı hem döşekleri dikmäk evelki zanaatını ilerleder. Bu ustacılaa o taa 1970-ci yıllarda üürenmiş, açan dikmäk ţehında işläärmişti da ozamandan sevgili işindän brakılmamış.
«1973-cü yıldan nicä çekettim işlemää, işledim şveynıda, ilkin terzilii. Sora açan üürendim bunu da işlemää, işlärdim karışık. Hem ruba dikärdim, hem yorgan»,- nışannadı Elena Çeban, el ustası.
Elena Dmitrievna, nekadar kendisini aklısında tutȇr, ana-boba evindä yapaadan yorgannarı kullanardılar, onun laflarına görä — onnar natural sıcaklıını koruyȇrlar. Bu tradiţiyayı Elena Çeban kendi aylesinä dä geçirdi, ilerlederäk dikmää sıcak tertipleri yakın insannarına hem yabancılara.
«İlerdän taa kalmış. Yapaalan sıcak. Üzü dä yapaa, içi dä yapaa. Üzü yapaa, hastarı – çit. Kendi işlerimi kullanȇrım. Doldurdum uşaklarıma da, unuklalarıma da. Hayvan tuttuk. Yapaaları yıkaardık, didärdik, taradardık, doldurardım yorgan da, döşek tä»,- dedi Elena.
Gagauz halkın adetlerinä hem tradiţiyalarına el ustası büük saygıylan davranȇr. Çok yıl sıravardı yorgannarı hem döşekleri sıralara diker.
«Çiizlik diktim pek çok. Diktim senselelerä dä, komşulara da, ölülerä dä. Kim getirdi – hepsinä diktim, kimseyi çevirmedim»,- nışannadı usta.
Zamannan, butakın ev tertiplerinä sorumnuk düştü, söleer Elena Çeban. Diktirer yorgan o insan, kimin hazırlıı var, taa çoyu da satın alȇrlar. Bakmadaan insanın seçmesinä, usta kendi işini ilerleder hem korudȇr bilgilerini gelän evlad boylarına.