Bir vakıda Merkez Seçim komissiyasının kuruluşu için kanon proekti kritika altına düştü.Bunun için haberledi GHT viţe-spikeri Georgiy Leyçu, nışannayıp,ani bekläärdi diil sade kritikayı,ama teklifleri dä ,nasıl çözmää problemayı. «Kimi sıradan çıkan kolaylıkları GHT deputatların seçimnerin kuruluşunda» kanon proekti bakıldı cümnä seslemeklerdä deputatların pay almasınnan,aktivistlärlän hem cümnä temsilcilerinnän.
GHT viţe-spikeri Georgiy Leyçu cümnä seslemeklerdä temsil etti «Kimi sıradan çıkan kolaylıkları GHT deputatların seçimnerin kuruluşunda» kanon proektini, geçirmää deyni kanon verici organına 8-nci çaarışın seçimnerini.Kanon proektin avtoru urguladı,ani dokument lääzım oldu,kanon kimi bölümnerini davaa instanţiyasınnan durgutmasının beterinä, angısı kontrol eder MSK kuruluşunu.Bu iş köstek koydu GHT seçimnerin kuruluşuna.
«Gagauziyanın MSK 9 azasıdan kurulȇr, 3- GHT çıkarılȇrlar, 3 – Bakannık komitettän hem 3- davaa instanţiyalardan Komrattan, Valkaneştän hem Çadırdan»,- söledi Georgiy Leyçu GHT viţe-spikeri.
Taa illeri davaa instanţiyalara dooruduldu danışmak belli etsinnär deyni davaa organnardan temsilcileri.
«Biz kablettik cuvabı,ani bizim hepsi kanon proektleri bulunȇrlar davaada.Da onnar bizä vermeyeceklär, var ölä şüpä, ani burada da vermeyeceklär»,- nışannadı Vladimir Kıssa GHT deputatı
«Önemli geçirmää seçimneri, belli edip datayı hem belli edilsin, angı sırada seçim kapmaniyası gidecek hem neylän o lääzım bitsin. O lääzım bitsin Moldovanın üülen tarafın hem Gagauziyanın vatandaşların hakların korumasınnan»,- söledi Pötr Paşalı istoriya doktoru
Cümnä seslemeklerin pay alannarı tutturdular bu kanon proektini kendi ideyalarını teklif edip.
«En önemli – GHT seçimnerin datasını belli etmää, bu ilk. Açan data belli, bu zamana kadar var nicä kanonu kabletmää yada hep o oturtuşta,nasıl deputatlar kabledeceklär»,- söledi Valeriy Yanioglo Bakannık komitetin başın eks-yardımcısı.
Bir vakıda komissiya işleyecek davaa kararın çıkarılmasınadan hem kanon avtorun fikirinä görä, yardım edecek geçirmää seçimneri 2026 yılın mart ayın çeketmesindä. Urgulȇȇrız,ani GHT deputatların mandatları biterlär 2025 yılın noyabrinin 12-dä.