Kıpçak küüyündä geçti 4-cü halklararası güreşmäk turniri. Adalıydı o Moldovanın anılmış trenerinä Franjev Födora. Turnirdä pay aldılar sportçular Kıpçaktan, Tiraspoldän, Komrattan, Kişinövdan hem Türkiyedän.
Serbest güreşmesi turniri topladı sportçuları türlü erlerdän. Herbir güreş — profesional hem kaliteli uurda. Yarışmak Födor Franjevin adına, o çok sportçulara açtı güreşmäk yolunu. Onun dostu Konstantin Keleş kaçırmêêr bir dä turniri.
«Biz onu unutmêêrız, sevineerim, ani bu turnir kurulêr, saa olsunnar yardımcılar, kim yardım eder götürmää. İnsan yaşêêr, nekadar onu anêrlar. Ölä vardı hem olacek»,- nışannadı Konstantin Keleş.
Turnirdä pay aldılar sportçular Türkiyedän, nışannayıp, ani o halklararası turnir. Edirne Güreş federaţiyası başı Şamil Delen söledi,ani Franjev Födorlan tanıştı 28 yıl geeri.
«Toduru çok sevdiimiz için burayı her yıl geleriz. Çok kaliteli matçlar olêr, Moldova, gagauz sportçular, güreşicilär çok kaliteli, çok ii etişmiş çocuklar, trenerleri da kutlêêrım, çok ii etiştirmişlär»,- Şamil Delen söledi.
Anılmış güreşci Pötr Yanulov Födor Franjevin terbiedennerin birisi.
«O terbi etti bizdä en ilk saygıyı biri-birimizä,ki biz saygı duyalım başka sportçulara. Sora sport ruhunu terbi etti, ki biz annayalım, ani sportta var kurallar, angılarına görä lääzım taramaa, hem var yaşamak kuralları, angılarına görä lääzım yaşamaa»,- Pötr Yanulov söledi.
Bu turnir geçer artık 4 yıl sıravardır, hep ileri dooru da geçirilecek, dedi Franjev Födorun çocuu Mihail: «Benim için bu en ilk bobamın adı, bizim trenerin, hep ölä dä biz ilerlederiz güreş sportunu, angısınnan bobam yaşaardı hem kaldırdı onu ayaa küüdä hem Gagauziyada, sayȇrım, ani temeli bu sportta o koydu».
Turnirin tarayannarına hazırlanmıştı ödüllär. İlk er için -1000 evro, ikinci er için -750 evro, üçüncü er icin -500 evro. İlk eri kazandı Kıpçak küüyün komandası.
Самые интересные новости Гагаузии и Молдовы в телеграм-канале GRT!