Komrat kasabasının №8 uşak başçasında güz zamanına adalı yortu geçti. Hazırlamak grupasının terbiedenneri üüredicilerinnän birliktä güz zamanın gözelliini gösterdilär hem annattılar bu yıl zamanın özellikleri için.
Altın güz zamanı atosferasına daaldılar uşaklar hem terbiedicilär. Sarı, eşil, kırmızı, mor…. türlü renklär donadȇrlar dolayı güz zamanı geldiynän. Güz pek gözäl. Severlär onu hem büüklär hem dä küçüklär.
Kendi şiirlerindä hem türkülerindä uşaklar annattılar güz zamanın zenginii için, onun için neyi bizä güz baaşlȇȇr. Uşaklar büük havezlän talantlarını hem becermeklerini gösterdilär. Şiir annattılar hem türkü çaldılar üç dildä. Zal donadılıydı. Bu donakları uşaklar kendi ellerinnän yaptılar, aaçlardan düşän yapracıkları havezlän topladılar. Butakım olaylar yardım ederlär uşaklara kendi becerleklerini ilerletmää, dünneyä taa açık bakışlan bakmaa, natura için eni bilgileri üürenmää, söleer Komrat kasabasının №8 uşak başçasının gagauz dili üüredicisi A.Kemençici.
«Uşaklarlan üürendik türküleri hem şiirleri altın güz için. Oyunnarı üürendik. Uşaklar pek beenerlär gagauz dilindä türlü zanaatları uşak başçasında. Biz onnarı geçireriz meraklı hem büük sevdaylan», — söleer Komrat kasabasının №8 uşak başçasının gagauz dili üüredicisi Anna Kemençeci.
Analar-bobalar söledilär, ani beendilär bu yortuyu hem sevinerlär, ani onnarda uşaklar üç dildä lafederlär.
«Bu uşaklarımıza deyni pek önemni. Onnar lääzım bilsinnär lafetmää gagauzça gem büüklärlän hem küçüklärlän. Bän gagauz dilini pek islää bilmeerim, rusum, ama uşaam bu dili bilsin isteerim», — söleer bu uşak başçasında terbiedilän uşaan anası İrina Jalbȇ.
İlerdä taa bir önemni güz yortusu – «Kasım». Ona da uşaklar hazırlanacȇklar. Аdetleri kullanarak yortuyu kutlayacȇklar.
