“Köpeklär insan gibi akıllı – sabece lafetmää becermeerlär” – bölä sayȇr uzman angısı köpekleri terbi eder.  Genç hem başarılı kinolog için bizim sıradakı süjetimiz.

Komratlı Nikolay Kazarenko küçüklüündän hayvannarı seveer ama en büük eri bu sevgidä kaplȇrlar köpeklär. 2000-cii yıllarda Komrat poliţiyasında izmetini götürärkana onun kollegası teklif edeer ona kinolog üürensin.

NİKOLAY KAZARENKO, kinolog: “Bolgar Nikolay Aleksandroviç bana dedi – kinolog zanaatına üürenmää istärsäydin, yollayalım seni. İlkin şüpäm vardı, düşünärdim lääzım mı bana bu, osaydı diil mi lääzım. Ama o bana dedi, ani taa bir zanaat, taa bir diplom zeedä olmayacȇk. Dedim, deneyim. Denedim da oldum. Şindi şükürüm Bolgar Nikolay Aleksandroviçä, çünkü onun hatırınnan zanaatım oldu”.

Bu takım küçüklüündän sevdii zanaat professional uuruna geçti. Bitkii yıllar Nikolay Kazarenko Türkiyä devletindä yaşȇȇr. Orada o köpekleri terbi eder. “Köpekleri üüretmää hem seslettirmää kolay. Onnarı sadece annamaa lääzım” – söleer Nikolay Kazarenko.

NİKOLAY KAZARENKO, kiniolog: “Köpään psihologiyasından artık annamam var. Çünkü uzun zaman türlü köpeklärlän karşı geldim. Bu günä kadar yakın 5 000 taanä köpek elimdän geçti. Bän onnarın harakterlerini bakışlarından annȇȇrım. Baktıkça, hemen var nasıl söleyim – sınık mı o, korkak mı, osaydı diil mi, ya da o çok sevgi dolu bir köpek mi”.

Köpek saabisindän sevgi hem saygı bekleer, söleer Nikolay Kazarenko, ozaman o en yakın dost kendisinä edenecek.

NİKOLAY KAZARENKO, kinolog: “En önemli sevgi. Sän onu sevmärsän ona kötü davranarsan, nekadar istäärsan imäk ver, köpek sana çekilmeyecek, nefret edecek sendän. Ama en büük ödül – dooru yaklaşım, dooru davranmak. Ozaman köpek seni çok sevär”.

Nikolay Kazarenko “Onnar bizä örnek” programmasının baş kahramanı oldu.

 

Tekst: V.Keman A.Terzi, Video: S.Georgiyev,Montaj:T.Kazaku